Dekabr ayında ChatGPT WhatsApp-a inteqrasiya olundu və bu, xüsusilə internetə məhdud çıxışı olan istifadəçilər üçün daha əlçatan oldu. İlkin mərhələdə istifadəçilər yalnız mətn sorğuları göndərə bilirdi və ChatGPT abunəçiləri ödənişli funksiyalardan tam istifadə edə bilmirdi. Lakin bu məhdudiyyətlər nəhayət aradan qaldırılıb. OpenAI bildirib ki, artıq ChatGPT WhatsApp üzərindən səsli qeydləri və şəkilləri qəbul edə bilir. İstifadəçilər mesaj yazmaq əvəzinə səsli qeydlər göndərə bilərlər. Çat-bot səsləri analiz edərək mətn formatında cavab verəcək.
İstifadəçilər artıq WhatsApp üzərindən ChatGPT-yə şəkillər göndərə və əlavə suallar verə biləcək. Çat-bot OpenAI serverlərində bu məlumatları emal edəcək və uyğun cavab təqdim edəcək. Media girişinin artıq qlobal miqyasda aktivləşdirilməsinə əlavə olaraq, OpenAI daha sonra istifadəçilərə WhatsApp-da öz ChatGPT hesablarına daxil olmaq imkanı verəcək. Bu yenilik, Plus və Pro abunəçilərinin ödənişli modellər kimi bəzi premium imkanlardan WhatsApp üzərindən istifadə etməsinə şərait yaradacaq. Bunu reallaşdırmaq üçün aşağıdakı addımları yerinə yetirmək lazımdır:
– 1-800-CHATGPT (1-800-242-8478) nömrəsini telefonunuzun kontaktlarına əlavə edin
– WhatsApp-ı yenidən işə salın. ChatGPT-nin rəsmi hesabı WhatsApp kontakt siyahınızda görünməlidir.
Bundan sonra siz ChatGPT ilə mətn, şəkil və səsli mesajlar vasitəsilə ünsiyyət qura biləcəksiniz. Bu yenilik, məhdud internet paketi olan istifadəçilərə ChatGPT-dən daha səmərəli istifadə etməyə kömək edəcək, çünki ayrı bir tətbiq yükləmədən WhatsApp vasitəsilə çat-bota giriş imkanı verir. Həmçinin, bu inteqrasiya smartfonunda az yaddaşı olan istifadəçilərin ayrıca bir tətbiq quraşdırmaq ehtiyacını da aradan qaldırır.
Mənbə: Androidauthority
