Bakı. Günaydın:
ADA Universiteti İtaliya-Azərbaycan Universiteti təşəbbüsü
çərçivəsində Heyvandarlıq üzrə ilk bakalavr proqramını təqdim
edib.
Trend.az saytına istinadən Günaydın xəbər
verir ki, bu münasibətlə fevralın 20-si İtaliyanın aparıcı aqrar
şirkətlərinin nümayəndələrinin, bu sahədəki yerli və xarici
ekspertlərin, professor-müəllim heyətinin və tələbələrin iştirakı
ilə təqdimat keçirilib.
Tədbirdə çıxış edən ADA Universitetinin Prorektoru Elkin
Nurməmmədov bildirib ki, kənd təsərrüfatının əsas sektorlarından
biri olan Heyvandarlığın inkişafı bir neçə səbəbdən vacibdir. Həmin
səbəblər sırasında heyvandarlığın qida təhlükəsizliyinə,
regionların sosial-iqtisadi artımına və ölkəmizin qeyri-neft
sektorunun inkişafına təsirini qeyd etmək olar. Əlavə edib ki,
Azərbaycanın kənd təsərrüfatı strategiyası aqrar sahədə elmi
yanaşmaların və innovasiyaların tətbiqini nəzərdə tutduğundan, ADA
Universiteti bu işə fayda verə biləcək yerli kadrlar yetişdirməyi
öz məqsədlərindən biri kimi müəyyənləşdirib.
“Bu proqramın mühüm xüsusiyyətlərindən biri, tələbələrin təhsil
prosesinin bir hissəsini ADA Universitetinin Gəncə kampusunda davam
etdirmələri olacaq. Burada onlar öz sahələri üzrə praktiki
biliklərini inkişaf etdirəcək və özəl şirkətlərlə əməkdaşlıq
çərçivəsində sahə təcrübəsi və təqaüd imkanları əldə edəcəklər.
Kənd təsərrüfatı və qida elmləri fakültəsinin bakalavr
ixtisaslarına xüsusilə Bakıdan kənardakı tələbələrin də cəlb
edilməsi məqsədilə ADA Universiteti özəl sektorla birlikdə təqaüd
proqramları üzərində çalışır”, – deyə Prorektor Elkin Nurməmmədov
əlavə edib.
<!—->
<!––>
Kənd təsərrüfatı və Qida elmləri fakültəsinin dekanı Mateo
Vittuari vurğulayıb:
“İtaliya-Azərbaycan Universiteti layihəsi çərçivəsində italyan
universitetləri və şirkətləri ADA Universiteti ilə əməkdaşlıq edir.
Xüsusilə Bolonya Universiteti ən son heyvandarlıq texnologiyalarını
və bu sənayedəki aparıcı şirkətlərin təcrübələrini azərbaycanlı
gənclərlə bölüşür. Bu səbəbdən də Heyvandarlıq üzrə bakalavr
proqramı beynəlxalq standartlara əsaslanaraq, regionların
inkişafına fayda verəcək mütəxəssislər yetişdirəcək, onlara ən
yaxşı təcrübəni qazandıracaq.”
Təqdimat “Təhsil vasitəsilə Heyvandarlıq sahəsində yeni iş
imkanlarının təqdim edilməsi” mövzusundakı panel müzakirələrlə
davam edib. Paneldə Azərbaycanı və İtaliyanı təmsil edən müvafiq
sahənin aparıcı ekspertləri, şirkət rəhbərləri və tədqiqatçılar
universitet-sənaye əməkdaşlığı, kənd təsərrüfatı sektorunda
məşğulluq və Azərbaycan iqtisadiyyatının şaxələndirilməsi üçün
beynəlxalq tərəfdaşlıqların rolu kimi mövzuları müzakirə
ediblər.
Tədbir iştirakçıları italyan mütəxəssislərlə görüşmək, aqrar
biznes, praktikanın məhsuldarlığa təsiri və digər mövzular barədə
söhbət aparmaq imkanı əldə ediblər. Həmçinin ADA Universitetinin
nümayəndələri iştirakçılara proqramın əsas komponentləri, tədris
metodu, təqaüd imkanları və gələcək karyera fürsətləri bardədə
ətraflı məlumat veriblər.
Xatırladaq ki, 2024-cü ildə ADA Universiteti İtaliya-Azərbaycan
Universiteti layihəsi çərçivəsində Bolonya Universiteti ilə birgə
təqdim etdiyi Qida elmləri və Kənd təsərrüfatı fakültəsinə Kənd
təsərrüfatı Texnologiyaları, Qida texnologiyaları və Menecment
(Kənd təsərrüfatı və Qida sənayesi) üzrə 110 tələbə qəbul edib.
