ABŞ Ədliyyə Nazirliyi təsdiqləyib ki, Google öz biznesini bölməli olacaq və xüsusilə Chrome brauzerini satmağa məcbur ediləcək. Məlumata əsasən bu tələb yeni məhkəmə sənədində öz əksini tapıb. Sənəd federal məhkəmənin qərarını dəstəkləyir və bildirir ki, Google axtarış bazarındakı monopoliyasından qanunsuz istifadə edib. Nazirlik sənəddə izah edir ki, Chrome-un satılması Google-un bu mühüm axtarış aləti üzərindəki nəzarətini birdəfəlik dayandıracaq. Bu addım rəqiblərə imkan yaradacaq ki, Chrome brauzeri ilə daha yaxşı inteqrasiya olunsunlar. Chrome milyonlarla istifadəçi üçün internetə giriş nöqtəsi rolunu oynadığı üçün bu dəyişiklik bazardakı rəqabəti gücləndirəcək.
ABŞ hakimiyyəti həmçinin keçmiş prezident Joe Biden-in administrasiyası dövründə təklif edilmiş qadağanı qüvvədə saxlayıb. Bu qadağa Google-un Apple cihazları və digər istehsalçıların qurğularında axtarış sistemi kimi standart olaraq quraşdırılmasını əhatə edir. Google bu müqavilələrdən tərəfdaşlıq ödənişləri alırdı, lakin bu praktika artıq qadağan edilib. Qadağa Mozilla Firefox brauzerini də əhatə edir. Eyni zamanda, Google-un süni zəka startaplarındakı paylarını satması tələbi ləğv edilib. Bu dəyişiklik Anthropic şirkətinin bəyanatından sonra baş verib – şirkət, uğurla fəaliyyətini davam etdirmək üçün maliyyələşməyə ehtiyacı olduğunu bildirmişdi.
Google CEO-su Sundar Pichai:
Tam investisiya qadağası əvəzinə, hökumət Google-dan süni zəka sahəsinə yatırdığı investisiyalar barədə federal və dövlət orqanlarını məlumatlandırmağı tələb edir. Google-un alternativ tədbirlər paketinə dair yekun təklifini yaxın zamanda təqdim edəcəyi gözlənilir. Dekabr ayında şirkət Ədliyyə Nazirliyinin ilkin təkliflərinin həddindən artıq olduğunu və məhkəmə qərarının yalnız axtarış sistemi üzrə tərəfdaşlıq müqavilələrinə aid olduğunu bildirmişdi. Alternativ olaraq, Google növbəti variantı təklif edib. Tərəfdaşlara Google axtarış sistemini quraşdırmaq üçün ödəniş etməyə davam etmək imkanı saxlamaq və eyni zamanda, həmin tərəfdaşlara digər axtarış sistemləri ilə də əməkdaşlıq icazəsi vermək.
Bu modelə görə Apple, iPhone və iPad-də fərqli axtarış sistemlərini standart olaraq quraşdıra bilər. Brauzer tərtibatçıları isə hər 12 ayda bir standart axtarış sistemini dəyişmək imkanı əldə edərdi. The Washington Post-un məlumatına görə, ABŞ Ədliyyə Nazirliyinin mövqeyi Trump administrasiyasının böyük texnologiya şirkətlərinə qarşı sərt antiinhisar siyasətini davam etdirəcəyini göstərə bilər. Bu, Trump-ın seçki kampaniyası zamanı İT nəhənglərindən dəstək almasına baxmayaraq baş verir. İş üzrə yekun qərarı məhkəmə hakimi Amit Mehta verəcək. O, daha əvvəl Google-u monopolist elan etmişdi. Tərəflərin təkliflərinin müzakirə ediləcəyi məhkəmə iclası apreldə keçiriləcək.
Mənbə: Engadget
