Nəhəng Starship raketi gələn ilin sonuna qədər Marsa yola düşəcək. Bunu SpaceX şirkətinin rəhbəri Elon Musk özünün X sosial şəbəkəsində elan edib. Bu, insansız, avtomatik idarə olunan uçuş olacaq. Əgər hər şey plan üzrə getsə, 3 ildən sonra pilotlu missiyalar da başlaya bilər. 2026-cı ilin sonunda Marsa ekipaj əvəzinə insanabənzər Tesla Optimus robotu göndəriləcək. Elon Musk insanların Marsa enişinin 2029-cu ildə baş tuta biləcəyini, lakin gözlənilməz maneələr olarsa, bu tarixin 2031-ci ilə qədər uzana biləcəyini etiraf edib.
Robot indiyə qədər yaradılmış ən böyük raket olan Starship ilə uçacaq. Musk bu layihəyə böyük ümidlər bəsləyir, baxmayaraq ki, son iki sınaq uçuşu uğursuz olub. Starship-in inkişafından cavabdeh olan SpaceX şirkəti problemin səbəblərini araşdıracağına söz verib, çünki əks halda ABŞ Federal Mülki Aviasiya İdarəsi (FAA) raketin gələcək uçuşlarına icazə verməyəcək. Starship-ə NASA da güvənir.
Kosmik gəminin bir versiyası NASA-nın “Artemis” proqramı çərçivəsində Ay modulu kimi istifadə olunacaq. Elon Musk isə daha geniş miqyasda düşünür – o həm Ayı, həm də Marsı fəth etməyi, bununla da insanlığı “multiplanetar” bir növə çevirməyi planlaşdırır. 2016-cı ildə Musk, Dragon gəmisinin 2018-ci ildə Marsa gedəcəyini demişdi. 2020-ci ildə isə bu tarixi 2026-cı ilə ertələdi. 2024-cü ildə isə bu tarixi bir daha təsdiqləyərək Marsa məhz Starship-in uçacağını bildirdi.
Mənbə: BBC
