Huawei şirkəti Çində Smart Glasses 2 adlı yeni ağıllı eynəyini təqdim edib. Bu cihaz öz kateqoriyası üçün qeyri-adi hesab edilən dizaynla – içi boş titandan hazırlanmış dairəvi çərçivə və optik linzalarla fərqlənir. Şirkət bildirib ki, çərçivənin dayanıqlığı və zərifliyi təmin etmək üçün 33 texnoloji prosesdən keçib. Lakin məhsulun üstünlükləri təkcə yığılma keyfiyyəti və xarici görünüşü ilə məhdudlaşmır. Huawei-nin yeni ağıllı eynəyi süni zəkaya əsaslanan bir sıra funksiyaları da dəstəkləyir. Bunlardan biri – səsli əmrlə aktivləşdirilə bilən onlayn nitq tərcüməsi funksiyasıdır.
Huawei dəstəklənən dillərin siyahısını açıqlamasa da, cihazın müxtəlif dillər arasında axıcı tərcümə təqdim edə biləcəyinə zəmanət verir. Bundan əlavə, cihazda Cervical Health 2.0 adlı funksiya da mövcuddur. Adından göründüyü kimi, bu funksiya qadın sağlamlığına yönəlib və bu sahədə istifadəçiyə müxtəlif tövsiyələr verə bilər. Cihaz həmçinin hava proqnozunu göstərmək, planlaşdırılmış işləri xatırlatmaq imkanına malikdir. Baş hərəkətləri ilə idarəetmə funksiyaları da dəstəklənir. Məsələn, gələn zəngə cavab vermək üçün sadəcə başı yüngülcə tərpətmək kifayətdir.
Smart Glasses 2 cihazı 9 saata qədər danışıq, 11 saata qədər isə musiqi dinləmə rejimində avtonom işləməyi təmin edən batareya ilə təchiz olunub. Batareyanın 0-dan 100%-ə qədər tam doldurulması 50 dəqiqə çəkir. Huawei-nin yeni ağıllı eynəyi artıq Çində satışdadır və təxminən 313$-a təklif olunur. Cihazın beynəlxalq bazara çıxışı barədə hələlik məlumat yoxdur, lakin qlobal bazar üçün şirkətin eyni funksiyalara malik Eyewear 2 modeli mövcuddur.
Mənbə: Notebookcheck
