Kia Nyu-York Beynəlxalq Avtosalonunda münasib qiymətə tam elektrikli sedan modeli olan EV4-ü təqdim edib. Yaxşı təchiz olunmuş və texniki baxımdan inkişaf etdirilmiş bu avtomobil, ABŞ bazarında təxminən 35000$ qiymətində satışa çıxacağı gözlənildiyindən, Tesla Model 3-ə rəqib olaraq nəzərdə tutulur. “Kia EV4 tam elektrikli avtomobilə sahib olmağı daha praktiki və büdcəyə uyğun variant axtaran, eyni zamanda qabaqcıl və texnoloji yürüş təcrübəsi yaşamaq istəyən müştərilər üçün əlçatan edir. EV4-ün təqdimatı Kia-nın elektrikli mobilliyi daha geniş auditoriya üçün cəlbedici etməyə yönəlmiş ümumi səylərini vurğulayır – bu auditoriya uzun müddətdir elektromobillər ətrafında yaranan marağı izləyir və indi onların üstünlüklərini şəxsən yaşamağa hazırdır” – deyə Kia America-nın icraçı vitse-prezidenti Steven Center bildirib.
Lakin ABŞ alıcıları üçün bu cəlbedici qiymət əlçatmaz ola bilər, çünki ABŞ administrasiyası tərəfindən açıqlanmış yüksək gömrük rüsumları bu planlara təsir göstərə bilər. İdxal rüsumları EV4 də daxil olmaqla, istənilən xaricdən gətirilən avtomobilin qiymətini 25% artırmaq təhlükəsi yaradır. Kia EV4 modelini Cənubi Koreyada istehsal etməyi və ABŞ-da satışa 2026-cı ilin birinci rübündə başlamağı planlaşdırır. Kia EV4 üçün çox aşağı hava müqaviməti əmsalı əldə edib – bu göstərici cəmi 0.23 təşkil edir ki, bu da Tesla Model 3 ilə eynidir. Bununla yanaşı, elektrik avtomobilinin dizaynı olduqca cəlbedicidir və bir çox baxımdan klassik idman avtomobilini xatırladır. Şaquli arxa işıqlar, damda yerləşən iki hissəli spoyler və aerodinamik bamper dizaynı ona daha dinamik və texnoloji görünüş verir.
Ön ötürücülü bu avtomobil 150 kilovat gücündə elektrik mühərriki ilə təchiz olunub və yaxşı yürüş ehtiyatı ilə seçilir. Light versiyasında quraşdırılmış 58.3 kilovat/saatlıq standart batareya 427 km məsafənin qətt edilməsini təmin edir, Wind və GT-Line versiyalarında isə 81.4 kilovat/saatlıq daha böyük tutumlu batareya 531 km-ə qədər yürüş imkanı verir. EV4, sənaye standartına çevrilmiş NACS portu vasitəsilə daimi cərəyanla sürətli enerji yığma funksiyasına malikdir və bu proses cəmi 30 dəqiqə çəkir. Kia EV4 həmçinin i-Pedal 3.0 adlı mühərrik əyləci ilə enerji bərpa sistemi ilə təchiz olunub.
Sürücülər avtomobilin batareyasından noutbuk, smartfon və digər cihazları enerji ilə təmin etmək üçün də istifadə edə bilərlər. Avtomobil futuristik və minimalist interyeri ilə fərqlənir. Xüsusilə diqqət çəkən detallara iki şaquli çıxıntısı olan sükan, 64 rəngli dinamik işıqlandırma və iki 12.3 düym ölçülü ekran ilə 5 düym ölçülü iqlim nəzarət ekranını birləşdirən fərdiləşdirilə bilən istifadəçi interfeysi daxildir. Apple CarPlay və Android Auto protokolları dəstəklənir. Sahiblər EV4-ə smartfon vasitəsilə daxil ola bilirlər, Kia-nın süni zəka köməkçisi isə səs tanıma və təbii dil emalı texnologiyasından istifadə edərək avtomobil funksiyalarının idarə olunmasını və marşrut planlaşdırılmasını həyata keçirir.
EV4 standart komplektasiyada sürücüyə yardım sistemləri ilə təchiz olunub. Bunlara avtomobilin sürətini yol məhdudiyyətlərinə uyğun şəkildə avtomatik tənzimləyən və öndəki nəqliyyat vasitəsi ilə məsafəni qoruyan Highway Driving Assist funksiyası daxildir. ADAS sistemi toqquşmaların qarşısını alır, avtomobili zolaqda saxlayır və ağıllı parklama imkanını təmin edir. Kia artıq EV4 modelini Cənubi Koreyada satışa çıxarıb və ilin sonuna qədər elektromobilin Avropaya çatdırılmasına başlanacağı gözlənilir. ABŞ-da satışların 2025-ci ilin son rübündə və ya 2026-cı ilin ilk rübündə başlaması planlaşdırılır.
Mənbə: Techcrunch
