Bakı. Günaydın:
Milli Məclisin NATO Parlament Assambleyasındakı nümayəndə heyəti
deputat Ramid Namazovun rəhbərliyi altında 2025-ci il martın 6-8-də
Brüssel şəhərində işgüzar səfərdədir.
Bu barədə Trend-ə Azərbaycan Respublikasının NATO yanında
Nümayəndəliyindən məlumat verilib.
Bildirilib ki, heyət Azərbaycan Respublikasının NATO yanında
Nümayəndəliyinin məsul şəxslərinin də iştirakı ilə NATO Parlament
Assambleyasının Katibliyində və NATO-nun mənzil-qərargahında
ikitərəfli görüşlər keçirib.
NATO Parlament Assambleyasının Katibliyinə səfər çərçivəsində
heyət qurumun Baş katibi, Müdafiə və təhlükəsizlik komitəsinin
direktoru, Demokratiya və təhlükəsizlik komitəsinin direktoru,
Siyasi komitənin direktoru və Elm və texnologiya komitəsinin
direktoru ilə görüşlər keçirib. Görüşlər zamanı Azərbaycanla NATO
arasında əməkdaşlığın parlamentlərarası müstəvidə inkişafına dair
məsələlər ətrafında geniş müzakirələr aparılıb.
Nümayəndə heyətinin NATO-nun mənzil-qərargahında keçirilən
görüşləri çərçivəsində Təşkilatın İctimai diplomatiya idarəsinin
Əlaqələr bölməsinin rəhbəri, Siyasi məsələlər və təhlükəsizlik
siyasəti idarəsinin tərəfdaşlıq və qlobal məsələlər bölməsinin
direktoru və həmin idarənin Tərksilah və kütləvi qırğın
silahlarının yayılmaması bölməsinin Silahlara nəzarət şöbəsinin
rəhbəri ilə NATO-Azərbaycan əlaqələrinə dair ətraflı fikir
mübadiləsi aparılıb.
Görüşlər zamanı Azərbaycan-NATO tərəfdaşlığının 30-cu ildönümü
çərçivəsində 2024-cü il üzrə əməkdaşlıq böyük məmnuniyyətlə
qarşılanıb, Sülh Naminə Tərəfdaşlıq Proqramı çərçivəsində
Azərbaycan-NATO tərəfdaşlığı, Azərbaycanın NATO-nun rəhbərlik
etdiyi sülhməramlı əməliyyatlara və Avropanın enerji
təhlükəsizliyinə töhfəsi yüksək qiymətləndirilib. Görüşdə həmçinin
Azərbaycanın nəqliyyat infrastrukturunun qlobal nəqliyyat
xəritəsində rolundan bəhs edilib.
Azərbaycan nümayəndə heyəti Silahlara nəzarət şöbəsinin rəhbəri
rəhbəri ilə görüşü zamanı Azərbaycanın üzləşdiyi mina problemi və
onun həlli istiqamətində NATO-nun maliyyə və texniki yardımı,
həmçinin müasir texnologiyaların öyrənilməsi və yeni metodların
tətbiqi kimi məsələlər müzakirə edilib. 2020-ci ilin noyabrından
bugünədək 383 mülki vətəndaşımızın mina partlamaları nəticəsində
həlak olması və ya yaralanması, minaların keçmiş məcburi
köçkünlərin doğma yurdlarına qayıdışını və həmin ərazilərdə
bərpa-yenidənqurma işlərinin aparılmasını ciddi şəkildə ləngitməsi,
eləcə də minaların humanitar, iqtisadi və ekoloji fəsadlarından
ətraflı şəkildə məlumat verilib.
Bundan əlavə, tərəflər arasında humanitar minatəmizləmə
sahəsində qarşılıqlı təcrübə mübadiləsi də geniş şəkildə müzakirə
edilib.
NATO mənzil-qərargahına səfəri çərçivəsində nümayəndə heyəti
həmçinin Azərbaycan Respublikasının NATO yanında Nümayəndəliyini də
ziyarət edib.
