Çində ilk dəfə olaraq bir şəhər təxminən 10 000 Mbit/s sürətində olan genişzolaqlı internetə keçid edib. Bu uğura paytaxt Pekinin ətrafında yerləşən Syun’an adlı yaşayış məntəqəsi nail olub. Mydrivers saytında dərc olunmuş məlumata əsasən, bu, Çində istifadəyə verilmiş ilk 10G genişzolaqlı şəbəkədir. Jurnalistlər bildiriblər ki, Huawei və China Unicom telekommunikasiya şirkətinin birgə səyləri nəticəsində Hebey əyalətində yerləşən bu şəhərdə adi vətəndaşlar üçün əvvəllər əlçatan olmayan sürətdə internet istifadəyə verilib. Telekommunikasiya şirkətlərinin fəaliyyəti nəticəsində 50G PON texnologiyasından istifadə etməklə şəbəkə üzərindən yükləmə sürəti 9834 Mbit/s-ə qədər çatdırılıb.
Bu nailiyyət, fiberoptik bağlantının əsas arxitekturasında edilən ciddi təkmilləşdirmələr sayəsində mümkün olub. Halbuki, əvvəllər bu tip şəbəkələr maksimum giqabit səviyyəsində məlumat ötürməyə imkan verirdi. Eyni zamanda, yükləmə və göndərmə sürətlərinin artması ilə yanaşı, şəbəkədaxili gecikmələr də azalıb və artıq millisaniyə səviyyəsinə düşüb. Son ölçmələrə görə, məlumat ötürmə sürəti indi 1 008 Mbit/s təşkil edir, serverə qoşulma ping göstəricisi isə 3 millisanəyəyə bərabər olub. Mydrivers ekspertlərinin yekun şərhində qeyd olunur ki, yeni texniki təkmilləşdirmələr təkcə yeni sürətlər deyil, həm də inqilabi həyat tərzi gətirib.
Mənbə: Mydrivers
