Meta Instagram-da yeniyetmələrin hesablarını süni zəka vasitəsilə daha sərt şəkildə nəzarətdə saxlayacaq. Məlumata əsasən bəzi hallarda sosial şəbəkə yetkinlik yaşına çatmamış istifadəçiləri müəyyən etmək üçün avtomatik olaraq hesab ayarlarını dəyişəcək – əgər istifadəçinin yaşını olduğundan böyük göstərdiyindən şübhələnərsə. 2024-cü ildən etibarən Instagram, istifadəçinin yaşını dolayı yolla müəyyən etmək üçün süni zəkadan istifadə edir. Məsələn, şəxsi mesajlarda 16 yaşla bağlı təbriklər bu əlamətlər sırasındadır. Sistem həmçinin davranış məlumatlarını da nəzərə alır, çünki yeniyetmələr adətən kontentlə oxşar şəkildə qarşılıqlı əlaqədə olurlar.
Bundan əlavə, 18 yaşdan kiçik istifadəçilərin hesabları standart olaraq gizli olur və tanımadıqları şəxslər onlara şəxsi mesaj göndərə bilməzlər. Həmçinin, bu hesablar üçün müəyyən kontentin göstərilməsində məhdudiyyətlər tətbiq olunur. Meta indi yetkinlik yaşına çatmamış şəxslərin hesablarında yalan yaş göstərdikləri halları daha fəal şəkildə aşkar etməyə başlayacaq. Əgər süni zəka müəyyən etsə ki, hesab bir uşağa məxsusdur, Instagram avtomatik olaraq həmin hesabı məhdudiyyətli rejimə keçirəcək. Lakin şirkət etiraf edir ki, sistem səhv edə bilər, buna görə də əvvəlki ayarları fərdi şəkildə bərpa etmək imkanı saxlanılıb.
Bildirilib ki, bu tədbirlər Meta-nın uşaqların qorunması ilə bağlı siyasətini tədricən sərtləşdirməsinin bir hissəsidir. Xüsusilə də Avropa Birliyi daha əvvəl şirkətin gənc istifadəçilərin təhlükəsizliyi üçün kifayət qədər tədbir görüb-görmədiyini araşdırmağa başladığından bu məsələ aktuallaşıb. Araşdırmalara səbəb isə sosial şəbəkədə azyaşlıların təqib edilməsi ilə bağlı məlumatlar olub – bu hadisələr ABŞ-da məhkəmə iddialarına da yol açıb. Bu arada, böyük texnoloji şirkətlər arasında internetdə uşaqların təhlükəsizliyinə görə məsuliyyət məsələsində vahid mövqe yoxdur.
Məsələn, mart ayında Google, Yuta ştatında qəbul edilmiş qanundan sonra Meta-nı öz öhdəliklərini tətbiq mağazalarının üzərinə atmaqda ittiham edib. Həmin qanun 18 yaşa qədər şəxslərin valideyn icazəsi olmadan axşam saat 22:30-dan sonra və gecə saatlarında sosial şəbəkələrdən istifadəsini qadağan edir. Snap və X şirkətləri də bu mübahisəyə cəlb olunublar. Ümumilikdə, ekspertlər qeyd edirlər ki, istifadəçilərin yaşına nəzarətin sərtləşdirilməsi, tənzimləyici orqanların və ictimaiyyətin artan təzyiqləri fonunda məcburi bir addımdır. Eyni zamanda, süni zəkanın real yaşı nə dərəcədə dəqiq müəyyən edə biləcəyi və bunun adi istifadəçilər üçün narahatlıqlara səbəb olub-olmayacağı hələ də aydın deyil. Yeni funksiyanın sınaqları ABŞ-da başlayacaq.
Mənbə: The Verge
