Bakı. Günaydın:
Respublikamızda dövlət səviyyəsində qeyd edilən əlamətdar
günlərdən biri də 8 Mart Beynəlxalq Qadınlar Günüdür. Bu
münasibətlə dövlətimizin başçısı qadınlara təbrik ünvanlayır,
onları fəxri adlarla, medallarla təltif edir, müxtəlif tədbirlər
təşkil olunur. Bütün bunlar Azərbaycan cəmiyyətində qadınlara olan
yüksək ehtiramın göstəricisidir.
Böyük məmnunluqla qeyd etməliyik ki, Azərbaycanda hər zaman
xalqımızın özünəməxsus milli dəyərlərindən və adət-ənənələrindən
irəli gələrək qadınlara dərin hörmətlə yanaşılıb, ana adı daim uca
tutulubdur. Eyni zamanda tarixin bütün dövrlərində Azərbaycan
qadını Vətənimizin müdafiəsində yaxından iştirak edib, siyasi və
dövlət quruculuğu sahəsində əsl vətənpərvərlik nümunələri
göstəribdir. Xalqımızın qədim yazılı abidəsi olan “Kitabi-Dədə
Qorqud” dastanında Azərbaycan qadınlarının savaş meydanında
göstərdiyi şücaətlər, o cümlədən Tomris, Sara Xatun, Nigar, Həcər,
Tutu Bikə kimi qəhrəmanlıq nümunəsi olan lider qadınlarımızın
fəaliyyətləri bunun bariz nümunələridir. Böyük şairimiz Nizami
Gəncəvi öz əsərlərində Məhinbanu və Nüşabə kimi qadın hökmdar,
əfsanəvi Fitnə və yeddi gözəl obrazlarını yaradıb. Görkəmli memar
Əcəmi Naxçıvani tərəfindən ucaldılan Möminə xatun türbəsi əzəmətli
memarlıq abidəsi olmaqla yanaşı xalqımızın qadına göstərdiyi
ehtiramdan xəbər verir.
Ötən əsrdən etibarən dünyada baş verən dəyişikliklər,
elmi-texniki inkişaf bütün sivil dövlətlərdə qadınların cəmiyyət
həyatında rolunun artması ilə müşayiət olunubdur. Azərbaycan qadını
bu dövrdə istər Azərbaycan Xalq Cümhuriyyəti, istərsə də, sovet
hakimiyyəti illərində yaradılan imkanlardan xalqın, dövlətin,
cəmiyyətin mənafeyi naminə çox səmərəli istifadə edib. Xüsusilə
qeyd etməliyik ki, Azərbaycan bütün dünyada qadınlara ilk seçki
hüququ verən dövlətlər sırasındadır. Şərqin ilk demokratik
respublikası olan Azərbaycan Xalq Cümhuriyyəti qadınlara seçki
hüququ verəndə bu gün özünü demokratiyanın beşiyi sayan dövlətlərdə
belə bir hüquq yox idi.
Xalqımızın tarixdəki görkəmli qadın şəxsiyyətlərinin yüksək
ləyaqətinin, ağbirçək analarımızın müdrikliyinin daşıyıcıları kimi
müasir Azərbaycan qadınları da öz zəkaları ilə cəmiyyətimizin
yüksəlişinə layiqli şəkildə xidmət edirlər. Qeyd etmək lazımdır ki,
xalqımızın Ulu Öndəri Heydər Əliyevin 1993-cü ildə ölkə
rəhbərliyinə qayıdışından sonra qadın hüquqlarının qorunması,
gender bərabərliyi kimi məsələlər xüsusi diqqət mərkəzində
saxlanılmışdır. Müstəqil respublikamızın 1995-ci ildə qəbul olunmuş
Konstitusiyası da qadın hüquqlarını dolğun təsbit etmişdir. Ulu
Öndər Heydər Əliyevin 1998-ci il 14 yanvar tarixli fərmanı ilə
qadınların hüquqlarının qorunması və ölkəmizin sosial və siyasi
həyatında onların iştirakının artırılması məqsədilə Qadın
problemləri üzrə Dövlət Komitəsi yaradılıb.
Əsası Ulu Öndər Heydər Əliyev tərəfindən qoyulan dövlət qadın
siyasəti, bu istiqamətdə yaradılan ənənələr Prezident İlham Əliyev
tərəfindən uğurla davam etdirilir. Möhtərəm Prezident qadınların
ölkə həyatındakı yerinə və roluna, o cümlədən onların dövlət
idarəetməsində təmsil olunmalarına, müxtəlif vəzifələrdə qadınlara
etimad göstərilməsinə diqqətlə yanaşır. Qadın problemləri üzrə
Dövlət Komitəsinin Ailə, Qadın və Uşaq problemləri üzrə Dövlət
Komitəsi kimi yenidən formalaşdırılması, Milli Məclis tərəfindən
“Gender (kişi və qadınların) bərabərliyinin təminatları haqqında”,
“Məişət zorakılığının qarşısının alınması haqqında” qanunların
qəbul edilməsi respublikamızda bu istiqamətdə keçirilən mütərəqqi
siyasətdən xəbər verir.
Bu gün Azərbaycan qadınları cəmiyyətin bütün sahələrində fəal
iştirak edirlər. Azərbaycan qadını həm siyasətçidir, həm
övladlarımıza bilik verən müəllimdir, həm sağlamlığımızın keşiyində
dayanan həkimdir, həm cəmiyyətin rifahına xidmət edən iş adamıdır.
Ən əsası, Azərbaycan qadınları xalqımıza məxsus yüksək mənəvi
dəyərlərin daşıyıcıları olaraq ana kimi layiqli övladlar tərbiyə
edir, böyüdür. Torpaqlarımızı işğaldan azad edən qəhrəman oğulları
vətənpərvərlik ruhunda formalaşdıranlar da ilk növbədə analardır,
Azərbaycan qadınlarıdır. Bu gün həm də şəhid anası olan Azərbaycan
qadını ən yüksək ehtirama layiqdir.
Dövlətim başçısının hər il 8 Mart Beynəlxalq Qadınlar Günü
münasibətilə Azərbaycan qadınlarına ünvanladığı təbrik qadınlara
olan ehtiramının göstəricisidir. Prezident İlham Əliyev bir neçə
gün öncə 8 Mart Beynəlxalq Qadınlar Günü münasibətilə Azərbaycan
qadınlarına təbrikində ailə dəyərlərimizə dərin sədaqət nümayiş
etdirən qadınların ölkəmizin ictimai həyatında böyük nüfuza malik
olduqlarını qeyd edib:
“Ötən müddət ərzində milli dövlət quruculuğu prosesində yaxından
iştirak edərək bütün sahələrdə əzmlə çalışan qadınlarımız
Vətənimizin qüdrətinin artırılması, xalqımızın rifahının yüksəlməsi
naminə dolğun və səmərəli fəaliyyət göstərmiş, sosial-iqtisadi və
mədəni inkişafda mühüm nailiyyətlər əldə etmişlər. Müqəddəs ailə
dəyərlərimizə dərin sədaqət nümayiş etdirən qadınlarımız ölkəmizin
ictimai həyatında böyük nüfuza malikdirlər. Əminəm ki, onlar gənc
nəslin Vətənə və milli ideallara bağlılıq ruhunda yetişməsi üçün
bundan sonra da qüvvələrini əsirgəməyəcək, həmçinin ictimai-mənəvi
mühitimizi yeni töhfələrlə zənginləşdirəcəklər”.
Azərbaycanda qadın hərəkatının inkişafında Respublikamızın
Birinci vitse-prezidenti, Heydər Əliyev Fondunun prezidenti
Mehriban Əliyevanın böyük xidmətləri var. Məhz Mehriban Əliyeva
özünün siyasi-ictimai fəaliyyəti ilə həm ölkəmizdə, həm də
beynəlxalq aləmdə Azərbaycan qadınının nüfuzunu daha da ucaldır.
Azərbaycan qadınları üçün xarakterik olan milli dəyərlər və yüksək
mənəvi keyfiyyətlər Mehriban Əliyevanın fəaliyyətində özünü
göstərir. Mehriban Əliyevanın rəhbərliyi ilə milli maraqlarımıza
xidmət edən və ənənələrimizi yaşadan çoxlu sayda böyük layihələrin
uğurla icra olunması Azərbaycan qadınının mərhəmət və
xeyirxahlığının, zəngin mənəvi-intellektual və yüksək əxlaqi
dəyərlərə malik olduğunun bariz nümunəsidir.
Respublikamızda həyata keçirilən mütərəqqi dövlət siyasətinin və
xalqımızın yüksək milli-mənəvi keyfiyyətlərinin nəticəsi olaraq
qadınların cəmiyyətdəki layiqli mövqeyi hər zaman qorunub
saxlanacaq. 8 Mart Beynəlxalq Qadınlar Günü münasibətilə qadınları
təbrik edir, onlara fəaliyyətlərində uğurlar arzulayıram.
Bayramınız mübarək, əziz xanımlar!
Xanlar Fətiyev,
Milli Məclisin deputatı
